PEMAHBAH

Om Swastyastu,

Wantah sangkaning asung kertha waranugraha Ida Sang Hyang Widi Wasa, taler Ida Bhatara Bhatari sasuhunan (Hyang Sinadyan Dewata) sane malingga ring kahyangan kawitan, melarapan antuk utamaning bhakti majeng ring Ida wastu prasida kasurat cakepan puniki sane kawastanin “ ALIH AKSARA LAN TEGES PRASASTI TUTUAN”. Indik daging cakepan puniki kaketus saking Prasasti sane kasungsung olih Warga Tutuan.

Cakepan puniki taler kajangkepin antuk peta/denah Pura Pura Kawitan Warga Tutuan sane wenten ring Desa Gunaksa jangkep taler antuk palinggih palinggih sane wenten ring Pura irika. Nenten lali taler kajangkepin malih antuk rahina/dina tatkala piodalan/wali ring soang-soang pura.
Tiosan ring punika taler, ring cakepan puniki kajangkepin malih antuk angge-anggean Warga Tutuan tatkala ngamargiyang atiwa-tiwa ( pangabenan ), inggih punika :
- Gambar lan sasuratan Rurub
- Gambar lan sasuratan Kajang
- Gambar lan sasuratan Ulon
- Gambar lan sasuratan Pelasa
- Gambar lan sasuratan Patrang
- Gambar lan sasuratan Luhur
- Gambar lan sasuratan Angkebrai
- Gambar lan sasuratan Tekep sarira
- Gambar lan sasuratan Tekep Bedusa
- Petulangan

Gambar lan sasuratan ring ajeng sampun kasungkemin olih para manggala Tutuan sajebag Desa Gunaksa, kasarengin antuk manggala/utusan warga Tutuan saking dura desa Gunaksa, sane prasida ngamiletin duk paparuman indike punika sane kawentenang ring Pura Batur tatkala rahina Saniscara, Paing, Menail, tanggal 31 Desember 2005 ( terlampir ).
Inggian angge-anggean ring ajeng punika boya sangkaning kakawi duk paparuman punika, wantah sangkaning sampun wenten saking nguni, punika mahawinan tatkalaning warga Tutuan pacang ngamargiyang atiwa-tiwa, angge-anggean punika patut kamargiyang.
Ring ungkur cakepan puniki malih kajangkepin antuk wewantenan tatkala pacang ngaturang Basan Tamba, nunas Tirta lan nunas Kajang, taler kajangkepin malih antuk Kalender Piodalan/wali ring Pura Pura Tutuan sane wenten ring Desa Gunaksa, ngantos warsa 2100.
Puniki sami gumanti wantah nagingin pikedeh pikarsan Warga Tutuan, utamannyane sane wenten ring dura Desa Gunaksa, mangdene prasida kauningin. Yukti tan prasida antuk tityang nagingin pikarsan Warga Tutuan maka sami, rumasa ring katunan lan katambetan titiyang. Antuk punika, janten sampun makeh kakirangan-kakirangannyane, minab ta wenten kasingsalan, antuk punika nenten lali tityang nunas agung pangampura.

Majeng ring para sujana, sang wikan ring sajeroning tata titining daging cakepan puniki, mangdene ledang arsa miteketin kasingsalan-kasingsalan lan ngawewehing kakirangan-kakirangan sane wenten ring cakepan puniki.

Agung suksema haturang tityang majeng ring sang sapasira ugi sane sampun ngutsahayang ngantos prasida cakepan puniki kamedalang. Pinih riin majeng ring Bapak Ida Bagus Sunu Pidada ( Geria Sengguan, Klungkung ) sane sampun ngalihaksarayang lan negesin Prasasti puniki, Bapak Nyoman Rijasa ( Tamanbali, Bangli ), Bapak Ketut Madra, SH ( Bakas, Klungkung ) sane sampun ngutsahayang Gambar lan sasuratan Kajang. Taler majeng ring samian Warga Tutuan ring dija ja magenah, sane sampun ngerastitiyang wastu prasida puput kasurat cakepan puniki. Dumadak Ida Sang Hyang Widi Wasa, Ida Bhatara Bhatari Kawitan asung kertha waranugraha, lamakane sida nemu kasukertan lan kadirgayusan ngantos kapungkur wekas.

PURA PUSAT KAWITAN WARGA TUTUAN

PRATISENTANA SIRA DALEM MANGORI

DESA GUNAKSA – KLUNGKUNG

Pura Pusat kawitan warga Tutuan megenah ring Desa Gunaksa,Kecamatan Dawan ,Kabupaten Klungkung, akeh nyane sekadi ring sor :

1.Pura Batur :

   Pujawali ring rahina Redite, manis, Langkir, Ida meraga Ciwa Niskala, ritatkala 

   ngemargiang upacara pitra yadnya patut nunas kajang kulit lan tirta pengentas.

2.Pura Penataran :

    Pujawali ring rahina Anggarkasih Medangsia, pinaka perantenan keanggen genah     

    rikala mekarya upakara mangge ring pura Tutuan.

3.Pura Bukit Mastapa :Pujawali ring rahina Anggarkasih Tambir,genah Ida   

   Sesuhunan nangun tapa (semedi) nunas ring Ida Sang Hyang Widi Wasa mangda  

   jagate rahajeng.

4.Pura Bukit Buluh :

   Pujawali ring rahina Anggarkasih Prangbakat,linggih inucap pinaka Pedharman

5.Pura Bukit Tengah :

   Pujawali ring rahina Anggarkasih Dukut,  pinaka Kawitan Hyang Ibu sesampun  

   kepralina,mesimpen ring (dua) sarcophagus sane wenten ring Pura Bukit Tengah

6.Pura Dalem Setra :

   Pujawali ring Anggarkasih Prangbakat, pinaka uluning setra , ritatkala ngemargiang

   upacara pitra yadnya patut nunas tirta Dalem.Taler setra inucap tan kedadosang  

   keanggen mendem utawi atiwa-tiwa siosan ring warga Tutuan.

Samian pura ring ajeng kewastanin Pura Pusat Warga Tutuan, Pratisentana Sira Dalem Mangori, sane kasungsung warga Tutuan sami.

Linggih Pura Pusat Warga Tutuan ring Catur Loka Pala :

	Utara Pura Bukit Tengah Kawitan Hyang Ibu Besi,warna selem, Bhatara Wisnu (4)
Pascima Pura Bukit Mastapa Nangun Tapa/ Semedi  Mas, warna ku ning,Bhatara Mahadewa (7)	Tengah Pura Bukit Buluh Pedharman Krawang,warna brumbun,Bhatara Siwa (8)	Purwa Pura Batur Siwa Niskala Timah,warnaputih, Bhatara Iswara (5)
	Daksina Pura Penataran Perantenan Tembaga,warna barak,Bhatara Brahma (9)

                                                                      Gunaksa,1 Januari 2010

Pengurus Pusat Warga Tutuan

Om Shantih,Shantih, Shantih, Om